Protesta kundër vizitës së kryeministrit Edi Rama në Izrael dhe deklaratave të tij në mbështetje të politikave izraelite ndaj Gazës u shoqërua me ndërhyrje policore mbrëmjen e sotme në Tiranë.
Kordoni policor nuk lejoi grumbullimin e qytetarëve para Kryeministrisë dhe arrestoi dy protestues. Pas ndalimit të tubimit, aktivistët u zhvendosën përpara Piramidës, ku vijuan denoncimet ndaj asaj që e cilësojnë si mbështetje të pakushtëzuar diplomatike dhe ekonomike të qeverisë shqiptare për Izraelin.
Me thirrjen “Jo në emrin tim”, protestuesit shprehën distancimin nga qëndrimi zyrtar i qeverisë dhe theksuan rritjen e ndjeshmërisë publike në Shqipëri për dënimin e veprimeve të Izraelit në Gaza dhe mbështetjen për kauzën palestineze.
Në shenjë solidariteti, protestuesit po vijojnë tubimin përpara Komisariatit nr. 1 në Tiranë, duke kërkuar lirimin e aktivistëve të arrestuar Enes Jashari dhe Eriselda Balliu.
Foto janë të CITIZENS
