Të shtunën, në ambientet e ish-Burgut të Spaçit, do të zhvillohet një protestë publike kundër ndërhyrjeve dhe punimeve që po kryhen aktualisht në këtë vend simbol të qëndresës dhe vuajtjes në diktaturë.
Organizatorët paralajmërojnë se ndërhyrjet po rrezikojnë të fshijnë një herë e mirë kujtesën historike të Spaçit, përmes materialeve dhe ndërtimeve të papërshtatshme që po deformojnë realitetin e asaj që përfaqëson ky vend.
Protesta është thirrur nga aktivistë, profesionistë të fushave të trashëgimisë, ish-të burgosur politikë, gazetarë dhe qytetarë të shqetësuar, të cilët kërkojnë ndalimin e menjëhershëm të ndërhyrjeve dhe hapjen e një debati të hapur me pjesëmarrjen e të gjitha palëve të interesuara.
"Punimet që po kryhen nuk kanë transparencë, as respekt për historinë. Ato janë një formë e re e zhbërjes së kujtesës kolektive," – thuhet në thirrjen e organizatorëve. Materialet e përdorura nuk reflektojnë realitetin e strukturës origjinale të burgut, dhe për pasojë, po rrezikojnë të shndërrojnë Spaçin në një fasadë të rreme.
Ky reagim vjen si pjesë e një valë më të gjerë mobilizimi kundër projekteve që, sipas kritikëve, po synojnë më shumë fshehjen e së kaluarës sesa ruajtjen e saj.
