Në prag të 30-vjetorit të genocidit në Srebrenicë, Presidentja e Kosovës, Vjosa Osmani, ka nderuar me "Medaljen Presidenciale të Meritave" nënat e Srebrenicës, në shenjë respekti për guximin dhe qëndresën e tyre përballë një prej tragjedive më të mëdha të kohës.
Në një postim në Facebook, presidentja Osmani theksoi rëndësinë e këtij nderimi duke shkruar: "Guximi i tyre i palëkundur përballë dhimbjes së paimagjinueshme të humbjes së më të dashurve të tyre, vendosmëria për ta shndërruar pikëllimin në shpresë dhe kujtimin në një kërkim të pandalur për drejtësi janë frymëzim për gjenerata të tëra."
Presidentja shtoi se ky akt është një kujtim i përhershëm për të gjitha viktimat e regjimit gjenocidal të Sllobodan Millosheviçit dhe një thirrje për drejtësi e mosharresë.
Kjo medalje përbën një vlerësim simbolik për rolin historik të grave dhe nënave të Srebrenicës në përpjekjen për të mbajtur të gjallë kujtimin e mbi 8,000 burrave dhe djemve të vrarë në korrik të vitit 1995.
