Një valë indinjate reagimesh ka përfshirë opinionin publik italian, pas publikimit të një kërcënimi makabër të drejtuar ndaj vajzës së Kryeministres Giorgia Meloni, Ginevra. Një përdorues i Instagram-it, që sipas informacioneve paraprake punon në Ministrinë e Arsimit dhe Meritës, publikoi një mesazh ku i uronte vogëlushes të njëjtin fat tragjik si ai i Martina Carbonaro-s, e reja nga Afragola e vrarë nga i fejuari i saj.
Ky mesazh tronditës u publikua nga partia Fratelli d’Italia në rrjetin social X, ku u cilësua si një “akt horror” dhe një “shprehje e papranueshme e urrejtjes politike që po kalon çdo kufi njerëzor e institucional”.
Reagimi i Kryeministres Meloni ishte i menjëhershëm dhe i prerë. Ajo dënoi ashpër ngjarjen, duke theksuar se nuk bëhet më fjalë për përplasje politike, por për një klimë shoqërore të sëmurë dhe të kalbëzuar.
“Është diçka më e errët... një urrejtje ideologjike, ku
gjithçka duket e lejueshme, madje edhe të urosh vdekjen e një fëmije për të goditur një prind. Politika duhet të dijë të bashkohet për të refuzuar këtë klimë të dhunshme,” – shkruajti Meloni në reagimin e saj publik.
Motra e Kryeministres, Arianna Meloni, gjithashtu shprehu zemërim dhe revoltë përmes një mesazhi emocional në rrjetet sociale, duke kërkuar dënim unanim e të fuqishëm për aktin.
Ministri i Arsimit, Giuseppe Valditara, konfirmoi se autoritetet po zhvillojnë hetime për të identifikuar autorin e mesazhit dhe paralajmëroi masa shembullore ndaj kujtdo që nxit ose përhap dhunë: “Ky është një akt i padenjë dhe i papranueshëm. Nuk do të ketë asnjë tolerancë për dhunën,” – deklaroi ai.
Ngjarja ka hapur një debat të ashpër në Itali mbi gjuhën e urrejtjes në rrjetet sociale dhe kufijtë që nuk duhet të kalohen kurrë, veçanërisht kur në shënjestër vendosen fëmijë të pafajshëm.
