Një përplasje institucionale është regjistruar mes kryetarit të Bashkisë së Tiranës, Erion Veliaj dhe Këshilli i Lartë i Prokurorisë, në lidhje me procedurat e ndjekura për statusin e prokurorit Ols Dado.
Në një kërkesë zyrtare drejtuar anëtarëve të KLP-së, Veliaj ngre pretendimin se kërkesa e tij për konstatimin e pavlefshmërisë absolute të dekretit të emërimit të prokurorit Ols Dado nuk është shqyrtuar nga institucioni si organ kolegjial, por vetëm nga nënkryetari i Këshillit, Erind Gërmenji.
Sipas dokumentit, gjatë shqyrtimit në Gjykatën Administrative të Shkallës së Parë Tiranë është konstatuar mungesa e një vendimmarrjeje kolegjiale të KLP-së për këtë çështje. Në të njëjtin kontekst, Veliaj thekson se shkresa nr. 413/3 prot., datë 11.03.2025, e firmosur nga Gërmenji, ku pretendohet se “KLP ka shqyrtuar kërkesën”, nuk pasqyron, sipas tij, realitetin procedural.
Në kërkesë argumentohet se trajtimi i çështjes është bërë në nivel individual nga nënkryetari i institucionit, dhe jo nga KLP si organ vendimmarrës kolegjial, ashtu siç parashikohet në legjislacionin përkatës.
Gjithashtu, referuar nenit 66 të ligjit “Për statusin e gjyqtarëve dhe prokurorëve”, theksohet se kompetenca për vendimmarrje mbi statusin e magjistratëve i takon vetëm Këshillit të Lartë të Prokurorisë. Në këtë kuadër, Veliaj pretendon se shkresa e nënshkruar nga Gërmenji përbën një akt të pavlefshëm, për shkak të mungesës së një vendimi kolegjial.
Në kërkesë ngrihen gjithashtu dyshime edhe mbi përfaqësimin e KLP-së në procesin gjyqësor nga përfaqësuesja ligjore e institucionit, duke u pretenduar se ajo është paraqitur pa një mandat të miratuar nga organi kolegjial.
Në përmbyllje të kërkesës, kryebashkiaku i Tiranës u kërkon anëtarëve të KLP-së të sqarojnë nëse kanë qenë në dijeni që nënkryetari Erind Gërmenji ka trajtuar dhe vendosur personalisht mbi çështjen e përfundimit të statusit të magjistratit Ols Dado.
