Shtetet e Bashkuara do të reduktojnë ndjeshëm praninë ushtarake në Siri, duke ulur numrin e bazave nga tetë në vetëm një. Këtë e bëri të ditur i dërguari i ri special amerikan për Sirinë, Thomas Barrack, i emëruar nga presidenti Donald Trump. Ai deklaroi se politikat e SHBA-së në Siri do të ndryshojnë rrënjësisht, pasi sipas tij, “asnjë prej tyre nuk ka funksionuar në 100 vitet e fundit”.
SHBA-ja aktualisht ka rreth 2,000 trupa në verilindje të Sirisë që bashkëpunojnë me forcat lokale për të parandaluar rikthimin e Shtetit Islamik. Barrack theksoi se zvogëlimi i bazave është pjesë e këtij ndryshimi strategjik. Largimi i trupave ka filluar tashmë nga provinca Deir el-Zor dhe po përqendrohen në Hasakah.
Ndërkohë, pas rrëzimit të ish-presidentit Bashar al-Assad dhe ardhjes në pushtet të Ahmed al-Sharaa, SHBA dhe vende të tjera po rifillojnë marrëdhëniet me Damaskun. Javën e kaluar, Barrack ngriti flamurin amerikan mbi ambasadën në Damask për herë të parë që nga viti 2012.
Ai gjithashtu nënvizoi rëndësinë e Forcave Demokratike Siriane Kurde (SDF) si aleate të SHBA-së dhe rolin e tyre në qeverinë e re siriane.
