Ministrja e Bujqësisë, Anila Denaj, ka reaguar për skandalin e filetos me salmonelë, duke deklaruar se Autoriteti Kombëtar i Ushqimit (AKU) ka kryer detyrën e tij sipas protokolleve dhe se çështja tashmë i takon institucioneve përkatëse.
Në një intervistë për Euronews Albania, dhënë nga Athina, ku ndodhej për një takim të Kryeministrit Edi Rama me shqiptarët, Denaj tha se nuk duhet bërë politikë me çështjet ushqimore. Ajo theksoi se AKU ka realizuar të gjitha kontrollet e nevojshme dhe ka referuar shkeljet për ndjekje të mëtejshme nga institucionet si krimi ekonomik dhe policia.
“Situata e AKU është e qartë; agjencia ka kryer detyrën dhe ka realizuar kontrollet e nevojshme. Sigurisht, lajmi është bërë publik, janë konfirmuar përgjigjet e analizave dhe i gjithë zinxhiri i kontrollit. AKU ka denoncuar ata që kanë shkelur protokollet. Çështja i takon institucioneve përkatëse si krimi ekonomik dhe policia, që duhet të japin gjykimin përfundimtar. Nuk bëhet politikë me ushqimin, është shumë e rëndësishme që të verifikohen prononcimet në media nga institucionet shtetërore. Jo vetëm që kemi reaguar, por gjithashtu i kemi çuar çështjet përpara institucioneve,” u shpreh ministrja.
Deklarata e Denaj vjen disa ditë pas publikimit të skandalit, ndërsa ende nuk ka një përgjegjësi të qartë mbi atë që ndodhi dhe as masa konkrete për të parandaluar raste të ngjashme në të ardhmen.
