Kryetari i Partisë Demokratike, Sali Berisha, ka akuzuar qeverinë për kopjimin e programit të opozitës, ndërsa premtoi një politikë të qartë për rikthimin e të rinjve shqiptarë në atdhe.
“Kundërshtarët tanë po kopjojnë programin tonë. Megjithëse ata janë plot gënjeshtra dhe korrupsion, sepse në këtë mënyrë e trajtojnë programin. Kanë 12 vjet në pushtet dhe nuk kanë ofruar asgjë, veçse kanë larguar njerëzit”, tha Berisha gjatë një takimi me të rinjtë në kuadër të fushatës zgjedhore.
Ai theksoi se PD ka 58 kandidatë nën moshën 40 vjeç, duke e konsideruar këtë një angazhim serioz për një politikë që synon të rikthejë të rinjtë shqiptarë në vendlindje.
Berisha solli si shembull suksesin e shqiptarëve në arenën ndërkombëtare, për të treguar potencialin e rinisë shqiptare. “Po të shikosh sot në mbarë botën, më të famshmit mes shqiptarëve janë të rinjtë. Mira Murati është magjistarja e inteligjencës artificiale, Dua Lipa ndoshta zëri më i bukur sot në skenën botërore. Shqipëria ka potencial, por qeveria aktuale i ka detyruar të largohen. Ne do të bëjmë gjithçka për t’i rikthyer,” u shpreh ai.
Berisha e konsideroi kryeministrin Edi Rama si “një arrogant të lindur”, duke thënë se ai “i urren të rinjtë, sepse ata nuk e pranojnë arrogancën e tij”. Ai theksoi se më 11 maj çdo i ri dhe e re duhet të votojë për ta lënë atë në të kaluarën.
Një nga premtimet e Berishës ishte rikthimi i TikTok-ut në Shqipëri, duke e lidhur ndalimin e kësaj platforme me censurën dhe trashëgiminë autoritare. “Me ndalimin e TikTok-ut, Rama u kthye tek babai i tij. Çdo diktaturë fillon me censurën”, tha ai.
Ai e akuzoi Ramën për mungesë reflektimi ndaj së kaluarës, duke e lidhur me veprimet e të atit, Kristaq Rama. “Ky person 2 metra i gjatë me atlete të bardha, që bën piktorin dhe sportistin në arenën ndërkombëtare, është biri i babait që firmosi varjen e poetit disident Havzi Nela në vitin 1988. Edhe pse djali nuk duhet të fajësohet për veprat e të atit, ai duhet të kërkonte falje në shenjë për të dënuar atë veprim. Por Edi Rama nuk e ka bërë kurrë këtë. Ai ka thënë se i ati ishte në anën e duhur të historisë”, tha Berisha.
