Ndonëse integrimi në BE nuk është monopol vetëm i Partisë Socialiste apo të varet vetëm prej qeverisë së tij, kryeministri Edi Rama vijon ta ketë kryefjalë të premtimeve në daljet publike. Edhe gjatë prezantimit të programit sot, Rama u kërkon votën shqiptarëve që në këmbim të marrin pasaportën e BE. Zotim që e shpreh në një mënyrë sikur pashaportën e shtyp në zyrat e PS dhe e përfiton çdo qytetarë që do e votojë.
“Mesazhi ynë është i qartë. Për t’ju dhënë pasaportën e BE, na duhet jo thjesht një mandat i katërt, por na duhet një mandat i fortë, më i fortë se të tre mandatet e derisotme. Prandaj kush e do pasaportën europian e BE-s, patjetër duhet të japë kontribut që Shqipëria të hy në BE dhe kontributi për Shqipërinë në BE është investimi i votës aty në qendër të fletës së votimit” – tha ai.
Mes shumë premtimeve që bëri dhe arritjeve të tre mandateve që trumbetoi, duke bërë krahasime me qeverinë e para 12 viteve, Rama foli edhe për analizat që u bëhen produkteve bujqësore. Sipas tij, nga 6 që bëheshin deri në 2013-ën, sot bëhen 1909.
“E fasin e flasin këneta dhe të gjithë moçalishtet e vogla rreth e rrotull për sigurinë ushqimore. Kur ne morëm detyrën kryheshin vetëm 6 analiza laboratorike të produkteve bujqësore. Sot kryhen 1909 lloje analizash të akredituara nga BE” – tha Rama.
Megjithëse kryeministri mburret për numrin e lartë të analizave bujqësore, Bashkimi Europian në dhjetor të vitit të shkuar i ktheu Shqipërisë 20 ton mandarina pasi ishin me pesticide. Madje në një investigim të fundit të BIRN, thuhet se një numër pesticidesh të ndaluara prej vitesh në tregun e Bashkimit Evropian, vazhdojnë të tregtohen në Shqipëri duke përbërë një rrezik serioz për sigurinë ushqimore dhe shëndetin e konsumatorëve.
Duke iu referuar sigurisë ushqimore, me gjasë kryeministri ndonëse jo drejtpërdrejtë ka dashur që t’i përgjigjej reagimit të fundit publik për rastin e fundit ku kompania “DiMal” që ka eksportuar 18.3 tonë fileto me bakterin e salmonelës. Policia ka shpallur në kërkim administratorin dhe ka proceduar tre inspektorë të AKU-s pasi nuk morën masa për subjektin në fjalë.
