Urimet për festën e Fitër Bajramit nga politikanët tashmë janë shndërruar në diçka rutinë, madje të bezdisshme, kur mendon që jemi në fushatë dhe çdo gjë përdoret në funksion të votave. Drejtuesit e shtetit, presidenti, kryetarja e parlamentit, kryeministri apo kryetari i opozitës, me radhë, kanë bërë urimet e përvitshme në forma të ndryshme, pa harruar të përdorin notat formale të fushatës për të marrë sa më shumë mbështetje.
Edhe Erion Veliaj, nga qelitë e paraburgimit, ka uruar për festën e Fitër Bajramit, ndërsa Belind Këlliçi nga PD duket nga të vetmit që nuk është kujtuar të bëjë një urim të tillë për besimtarët myslimanë. Në fakt, nuk do të kishte asgjë të çuditshme nëse nuk do të merrej me urime të tilla cliché për festa fetare, por një ditë më parë, në Facebook-un e tij, drejtuesi politik i Tiranës ka uruar Kryepeshkopin Johan në ditën e fronëzimit në krye të Kishës Ortodokse Autoqefale të Shqipërisë. Çka të çon të mendosh se, në rastin më të mirë, neglizhenca e ka bërë të harrojë t’i urojë besimtarëve myslimanë festën e Fitër Bajramit.
