Kryetari i Partisë Republikane, Fatmir Mediu, është takuar në rrugët e NY me Chris LaCivita, një nga strategët e fushatës së Donald Trump dhe drejtues i fushatës së PD-Aleanca për Shqipërinë Madhështore. Në një foto me të është dhe Phil Griffin, një personazh i njohur në botën e televizionit dhe ish-president i MSNBC.
Në një postim në Facebook, Mediu njoftoi se duke nisur nga java e ardhshme, ekipi i LaCivita do të jetë i pranishëm në Shqipëri për të ndihmuar opozitën deri më 11 maj. Kjo është hera e dytë brenda pak ditëve që Fatmir Mediu paralajmëron ardhjen e LaCivita-s në Tiranë për fushatën e zgjedhjeve të 11 majit, ndërsa deri më tani, përveç emrit të madh, vetë fushata e PD-së nuk ka shfaqur ndonjë element madhështor, përveç sloganit për Shqipërinë Madhështore.
Të shohim se çfarë do të ndodhë në ditët dhe javët në vazhdim, ndërsa vetë Mediu, me këtë vizitë të gjatë në SHBA, ka shmangur edhe paraqitjen në gjyqin që po zhvillohet në Tiranë për çështjen e Gërdecit, ku ai është një nga të akuzuarit kryesorë.
