Kreu i Partisë Demokratike, Sali Berisha, prezantoi sot në Durrës programin elektoral të “PD – Shqipëria Madhështore” për sektorin e fasonerisë, duke theksuar rëndësinë e mbështetjes së prodhimit vendas dhe lehtësimit të barrës fiskale për sipërmarrësit shqiptarë.
Gjatë fjalës së tij, Berisha sulmoi kryeministrin Edi Rama për daljet e tij të shpeshta ‘live’ në rrjetet sociale, duke ironizuar se 1 prilli është dita e tij, por “problemi është se çdo ditë e ka 1 prill.”
Duke u ndalur te premtimi i Ramës për rritjen e pensioneve në 400 euro deri në vitin 2030, Berisha e cilësoi këtë si një tjetër mashtrim elektoral. “Po pse nuk e bëri për 12 vite? Tani që e sheh se populli nuk i pranon dokrrat e tij me zhapinj e hardhuca, po shpik gënjeshtra të reja,” tha ai.
Kryedemokrati theksoi se fokusi kryesor i PD-së në këto zgjedhje do të jetë ekonomia, duke premtuar mbështetje për eksportet dhe luftë kundër informalitetit. “Këto zgjedhje janë për ekonominë. Ne kemi përcaktuar ‘Made in Albania’ si krenarinë kombëtare dhe do të bëjmë gjithçka për suksesin e sipërmarrësve shqiptarë,” u shpreh ai.
Në fund, Berisha akuzoi Ramën për manipulim të komunikimit me qytetarët, duke thënë se ai “i shpik vetë pyetjet dhe bën monologje, jo bashkëbisedime reale me qytetarët.”
