Kryeministri Rama ka reaguar ndaj akuzave të Partisë Demokratike se Partia Socialiste ka kopjuar programin elektoral të opozitës për zgjedhjet e 11 majit.
Rama i cilësoi këto akuza si “gjënë më qesharake në botë”, duke thënë se “a thua se bëhet fjalë për ndonjë kod atomik”.
“Qajnë hallin se edhe u kopjua programi, është gjëja më qesharake në botë a thua se bëhet fjalë për ndonjë kod atomik, a thua se bëhet fjalë për ndonjë kod kasaforte, Kodi i Da Vinçit, u kopjua Kodi i Da Vinçit, o zot o zot”, deklaroi Rama.
Gjatë bashkëbisedimit me qytetarët në rubrikën “Sy m’sy”, një komentues e pyeti Ramën për largimin e disa të rinjve nga Forumi Rinor i Partisë Demokratike (FRPD) drejt PS-së.
Rama mohoi se i ka “marrë” ata, duke theksuar se bëhet fjalë për një grup të rinjsh nga FRPD Vlora dhe një ish-zëvendëskryetare të forumit në nivel kombëtar, të cilët kanë zgjedhur ta mbështesin atë për arsye të tyre.
“Nuk i mora. Bëhet fjalë për një grup shumë interesant dhe pozitiv vajzash e djemsh të FRPD Vlorë dhe për dikë që ishte zv. kryetare e FRPD në shkallë kombëtare. Ata nuk u bënë socialistë, por janë pozicionuar për të dhënë mesazhin për arsyet e tyre. Ata do të bëjnë fushatën e tyre jo me PS por më vete”, tha Rama.
Rama ironizon PD-në dhe Berishën për negociatat me BE
Gjatë komunikimit të tij, Rama ironizoi edhe Partinë Demokratike dhe ish-kryeministrin Sali Berisha, duke theksuar se Bashkimi Europian nuk i merr në konsideratë njerëzit që kanë probleme me drejtësinë.
“Këtë bëhet fjalë me individë që kanë probleme të hapura me drejtësinë, si mendoni ju që BE këto nuk i merr në konsideratë?”, u shpreh ai.
Rama komentoi edhe për angazhimin e këshilltarit amerikan LaCivita nga PD, duke sugjeruar se nuk mjafton një konsulent i paguar për të ndikuar te qëndrimi i BE-së dhe SHBA-së ndaj Shqipërisë.
“Nuk mbyllen kështu filmat me BE, janë ndryshe. As me Amerikën”, tha ai.
