Këshilli i Lartë Gjyqësor miraton platformën elektronike, ku të gjithë zgjedhësit që votojnë nga jashtë vendit, të kenë mundësinë të paraqesin kërkesat e tyre, apo ankesat në rastet kur nuk gjejnë emrin në listë. Shqyrtimin e kërkesave do ta bëjë Gjykata e Tiranës, brenda 48 orëve nga momenti i paraqitjes së saj. Me vendimin nr. 129, datë 06.03.2025, qeveria e gjyqësorit ka miratuar “platformën elektronike “Microsoft Exchange Server” për paraqitjen e kërkesave edhe online për zgjedhësit që votojnë nga jashtë territorit të Republikës së Shqipërisë”. Sipas këtij vendimi kërkesat e zgjedhësve që votojnë nga jashtë territorit të vendit do të dërgohen në adresën zyrtare [email protected]. “Gjykata shqyrton dhe vendos për kërkesat e zgjedhësve që votojnë nga jashtë territorit të Republikës së Shqipërisë, edhe nëpërmjet platformës elektronike “Microsoft Teams”, brenda 48 orëve nga data e regjistrimit të kërkesës në sistemin elektronik të menaxhimit të çështjeve”, thuhet në vendimin e KLGJ.
