Komisioni Europian ka konfirmuar se është në dijeni të zhvillimeve mbi dekretin e ri për qendrat e emigrantëve në Shqipëri dhe është në kontakt me autoritetet italiane.
Zëdhënësi i KE për Punë të Brendshme dhe Migracion, Markus Lammert, deklaroi se legjislacioni italian do të zbatohet në këto qendra dhe se, në parim, kjo është në përputhje me ligjin evropian. Ai shtoi se KE do të vijojë monitorimin e protokollit në versionin e tij të ri.
Gjithashtu, ai theksoi gatishmërinë për të eksploruar zgjidhje inovative për kthimet, duke respektuar ligjin e BE-së dhe të drejtat themelore. Qeveria italiane ka miratuar dekretin për transformimin e qendrave në Shëngjin dhe Gjadër në qendra të ndalimit të riatdhesimit (CPR), ku do të dërgohen emigrantët që presin dëbimin.
