Kryeministri Edi Rama ka reaguar pas publikimit të kontratës së Partisë Demokratike për lobimin në SHBA, një marrëveshje që kap vlerën e 6 milionë eurove. Gjatë takimit me gratë dhe vajzat socialiste të Vlorës, Rama nuk e fshehu ironinë për këtë shumë parash.
“Unë besoj që të gjitha ju që jeni këtu sot ashtu si të gjithë të tjerët që e ndjekin këtë ballafaqim jeni sot të habitura nga fakti që janë paguar 6 milionë euro, thuhet nga patriot, ju kujtohet se edhe herën e kaluar Luli për 500 mijë u bë leckë edhe ai tha u mblodhën disa patriot.
Rama risolli në vëmendje dhe deklaratat e eksponentëve të opozitës, për heqjen e “Non Grata-s” pas ndryshimit të administratës amerikane.
“6 milionë euro për të hequr damkën e një personi ‘non grata’ janë shumë për të mos bërë pyetjen se ku i gjetën gjithë ato para dhe si mundet që thjeshtë dhe vetëm për hallin e një njeriu të paguhen më shumë para se sa shteti i jep për të gjitha partitë politike të marra së bashku, është edhe pak e çuditshme se ne na thanë se sa të vinte Trump do të ikte non grata tani na u dashkan edhe 6 milionë euro me shprese se do të hiqet non grata dhe sikur të rri dhe sikur të iki kjo nuk është çështja e shumicës dërrmuese të shqiptarëve që janë sot në një moment historik”, -tha ai.
Sot, Partia Demokratike ka konfirmuar se ka nënshkruar një kontratë lobimi në SHBA. Pasi media publikoi kontratën e nënshkruar nga Sekretari i Përgjithshëm Flamur Noka, PD deklaroi se: “Kontributi financiar për realizimin e këtij qëllimi është marrë përsipër 100% nga patriotë shqiptarë që jetojnë dhe punojnë prej dekadash në SHBA, si dhe nga demokratë të tjerë të larguar nga Shqipëria gjatë këtyre 10 viteve për shkak të regjimit të Edi Ramës.”
