Organizata shqiptaro-amerikane “Rrënjët Shqiptare”, e drejtuar nga Marko Kepi, grumbulloi rreth 1.6 milionë dollarë në ndihmë të personave të prekur nga tërmeti i datës 26 nëntor që goditi Shqipërinë. Të paktën zyrtarisht, këto janë shifrat e publikuara dhe që janë shpenzuar për t’u ardhur në ndihmë shqiptarëve të dëmtuar nga tërmeti.
Ndërkohë, 6 milionë dollarë janë mbledhur për të lobuar në Departamentin e Shtetit për PD-në dhe kryetarin e saj. Në një kontratë lobimi të publikuar nga FARA në SHBA, parashikohet që për 2 vjet PD do të paguajë 250 mijë dollarë çdo muaj. Sipas një deklarate zyrtare të selisë blu: “Kontributi financiar për realizimin e këtij qëllimi është marrë përsipër 100% nga patriotë shqiptarë që jetojnë dhe punojnë prej dekadash në SHBA, si dhe nga demokratë të tjerë të larguar nga Shqipëria gjatë këtyre 10 viteve për shkak të regjimit të Edi Ramës.”
Thënë ndryshe, patriotët shqiptarë në Amerikë janë prekur më shumë nga padrejtësitë e bëra nga Departamenti i Shtetit ndaj Sali Berishës sesa nga dëmet e shkaktuara nga tërmeti. Nëse në rastin e tërmetit, pa dallime politike, shqiptarët në SHBA kanë mundur të mbledhin 1.6 milionë dollarë, si ka mundësi që veç një pjesë e tyre, mbështetës të opozitës, të kenë mbledhur 6 milionë? Të jetë kjo e vërtetë, apo PD s’ka gjetur ende një alibi të besueshme për 6 milionë dollarët që duhet të paguajë për lobim në SHBA?
