Kandidatja e PD-së në listën e hapur për Tiranën, Erisa Bajaziti, artikuloi sot për herë të parë publikisht frikën se zgjedhjet mund të vidhen nga Edi Rama dhe qeveria. Në një takim të grave demokrate me disa eurodeputetë në Tiranë, ajo i drejtoi këtë pyetje eurodeputetit Antonio Lopez, i cili u përgjigj: “Do t’i ndjek nga afër dhe me vigjilencë këto zgjedhje, dhe nëse do të ketë prova për manipulime, sigurisht që do të denoncohen nga CDI. Do të doja që Shqipëria të mos kishte nevojë që zgjedhjet të ndiqeshin kaq nga afër. Si eurodeputet, do të jem vigjilent.”
Elmar Brok foli gjithashtu për rrethanat e pafavorshme me të cilat opozita po përballet në këto zgjedhje ndaj Ramës, duke këshilluar që edhe nëse PD-ja nuk do të fitojë, nuk duhet të braktisë parlamentin, por të vazhdojë betejën e saj me mazhorancën. Sipas tij, PD-ja do të ketë mbështetjen e grupit të CDI-së në Parlamentin Europian.
“Luftoni në dy javët në vijim dhe fitojini zgjedhjet,” ishte mesazhi i njërës prej eurodeputeteve të pranishme në takim. Grupi i deputetëve të CDI-së ka mbërritur në Tiranë dy ditë më parë dhe ka qenë i pranishëm në disa takime elektorale të PD-së.
