Pas incidentit të ndodhur dje në Ostren të Bulqizës, deputeti i Partisë Demokratike, Xhelal Mziu, ka reaguar ashpër duke akuzuar Partinë Socialiste për intimidim dhe shantazhe ndaj qytetarëve gjatë fushatës. Ai deklaroi se në takimin e opozitës në këtë zonë, përfaqësues të PS-së, përfshirë punonjës të ndihmës ekonomike dhe mbështetës të kandidatit socialist, kanë kërcënuar qytetarët për heqjen e ndihmës ekonomike në rast të pjesëmarrjes në takimet e PD-së.
Mziu pretendoi se situata u përshkallëzua kur babai i kandidatit të PS-së dhe mbështetës të tij sulmuan fizikisht përfaqësues të PD-së. Ai akuzoi gjithashtu policinë e Dibrës për manipulim të ngjarjes dhe refuzim për të marrë denoncime nga opozita, duke theksuar lidhjet familjare mes drejtorit të policisë dhe autorëve të dyshuar.
Ky nuk është incidenti i parë i Xhelal Mziut. Në vitin 2021 gjatë fushatës zgjedhore në Elbasan, kur një mbështetës i Partisë Socialiste humbi jetën pas një incidenti të rëndë, Mziu u vu në qendër të kritikave për një deklaratë të fortë ku tha se “kështu do të pësojnë të gjithë ata që guxojnë të prekin votat e demokratëve”. Ai më vonë kërkoi ndjesë publike për deklaratën, duke pranuar se ishte një deklaratë e papërshtatshme në rrethanat e ngjarjes.
