Një qytetar shqiptar që jeton në Londër ka denoncuar në redaksinë e VNA një problem serioz me dorëzimin e votës së tij përmes postës DHL. Sipas mesazhit të tij, pasi ka përfunduar procesin e votimit, ka tentuar të kontaktojë me postën përmes telefonit, por nuk ka marrë asnjë përgjigje.
Më pas, qytetari ka shkuar personalisht në një pikë të autorizuar të DHL. Aty, pas skanimit të barkodit, sistemi ka lëshuar një faturë me mbishkrimin “pako e dështuar”. Në komunikimin e tij, ai thekson se i është thënë që nuk është i vetmi që ka hasur këtë problem.
“Shkova vetë për ta dorëzuar, por sistemi nuk punonte. Pako e dështuar. Nuk mund të përpunohet. Më thanë që shumë të tjerë kanë pasur të njëjtën situatë,” shprehet ai në mesazhin e tij.
Ky rast është një nga shumë denoncimet që shqiptarët në diasporë kanë bërë për vështirësitë e hasura me fletët e votimit. Pak ditë më parë, disa emigrantë raportuan se kishin marrë zarfin e votimit pa përfshirë fletën për zgjedhjen e partive dhe kandidatëve.
Këto problematika kanë vënë në qendër të kritikave edhe KQZ-në, e cila duket se nuk ka marrë masa të mjaftueshme për t’i adresuar situatat. Vonesa në shpërndarjen e zarfeve dhe mungesa e veprimeve konkrete për të trajtuar denoncimet shtojnë shqetësimet për procesin e votimit të shqiptarëve jashtë vendit.
