Ish-kryebashkiaku socialist i Kavajës, Elvis Rroshi, ka reaguar pas publikimit të një fotografie ku ai shfaqej me kapuç në një takim elektoral të Partisë Demokratike. Në një postim në rrjetet sociale, Rroshi sqaron se kapuçi ishte i xhupit dhe e kishte vendosur mbi kokë për shkak të shiut.
“Unë kam qenë aty me një kapuç të xhupit mbi kokë sepse jashtë po binte shi. Kaq! Për ata që më njohin, më duan apo dhe s’më duan, e dinë mjaft mirë që kjo është shumë qesharake”, shkruan ai.
Rroshi thekson se nuk ka asnjë arsye të fshihet apo të maskohet, duke shtuar se gjithmonë i ka bërë ballë situatave politike më agresive.
Në reagimin e tij, ai sqaroi se pjesëmarrja në takimin elektoral ishte për të mbështetur kushëririn e tij, Elton Rroshi, kandidatë për deputet në qarkun e Tiranës.
“Unë isha në atë takim elektoral sepse mbështes kushuririn tim, djalin e xhaxhait, birin e Kavajës, Elton Rroshi. Dhe për të mbështetur njeriun e familjes time, unë nuk kam as frikë, as drojë e asgjë tjetër”, shprehet Elvis Rroshi, duke e cilësuar Eltonin si një njeri të ndershëm që meriton të përfaqësojë qytetarët në Kuvend.
