Presidenti i Partisë së Lirisë, Ilir Meta ka zhvilluar një intervistë me gazetarin Andrea Danglli për emisionin “Off the Record” në A2 CNN. Ilir Meta foli për ditët e tij në qeli, fushatën zgjedhore dhe pritshmëritë nga zgjedhjet e 11 majit.
Intervista e e Ilir Metës për “Off the Record”
-Si po e zhvilloni fushatën elektorale nga qelia dhe si mendoni që situata ku gjendeni do të ndikojë në rezultatin e Partisë së Lirisë?
Përgjigje: Fushata ime ecën me ritme të shkëlqyera, nga 80-150 letra në ditë.Ajo filloi me 50-100 letra në ditë dhe do të përfundojë me 200 letra në ditë besoj.Po kështu jam i bindur se Partia e Lirisë ecën e sigurt drejt 12 mandateve të saj (4+8).Unë u rrëmbeva në 21 Tetor në mënyrë banditeske, siç u rrëmbye Aldo Moro në Itali nga brigadat terroriste, pikërisht për shkak të 11 Majit, që Rama të grabisë 1 mandat të katërt, por gjërat kanë ndryshuar shumë që atëherë. Njerëzit e Partisë së Lirisë, kudo po punojnë në terren dhe më mirë se një pjesë e strukturave. Jam çdo ditë në kontakt me dhjetëra e qindra prej tyre.
-Ish-kryetarja e Partisë së Lirisë, znj.Monika Kryemadhi po bën fushatë për ju në Tiranë, si e keni pritur këtë iniciativë?
Përgjigje: Të gjithë ata që janë sinqerisht kundër regjimit, janë të mirëpritur në fushatë.
-Disa nga figurat më aktive të partisë tuaj janë pozicionuar krah PS. A i druheni ikjeve të tjera nga partia juaj?
Përgjigje: E falënderojmë Edi Ramën dhe SPAK-un e tij që po na e pastron partinë dhe po i merr të gjithë përfituesit dhe njerëzit me probleme me vete.
-Ish Sekretari i Përgjithshëm i Partisë së Lirisë, Endrit Braimllari, i njohur si një nga bashkëpunëtorët më të afërt i juaji dhe zonjës Kryemadhi , ju ka akuzuar për shpifje dhe shantazhe, ku ka paralajmëruar ndjekjen e rrugës ligjore pas 11 Majit. Pse gjithë kjo përplasje?
Përgjigje: Ai ishte simboli i nepotizmit në parti dhe i vetmi dëm që na bëri është se na mori financieren e Partisë për 20 vite, pa e lejuar të bënte dorëzimet në mënyrë ligjore dhe etike , siç dorëzohet një detyrë me përgjegjësi financiare. Ah po edhe databazën e partisë. Rama e kishte projektuar për kryetar të LSI , por shumë mirë që e futi në listën e tij për Tiranën se na ndihmon të marrim shumë më tepër vota socialistësh të ndershëm, që neveriten kur shikojnë shëmtira të tilla morale, që vetëm Rama mund ti pranojë nga dëshpërimi dhe perversiteti për diversion.
-Si e konsideroni rolin e SPAK në këto zgjedhje, si ndihmë për opozitën apo pengesë?
Përgjigje: Asnjë ndryshim nga qëndrimet e mia koherente për SPAK. Gjithmonë mburojë e krimit elektoral. Edhe kur vepron, si kofini pas të vjelit.
A keni pasur zhgënjime, reflektime apo befasi gjatë kësaj kohe?
Përgjigje: Sa herë gjyshërit tanë kishin momente të vështira thoshin: Malet tona më të larta. Dhe unë stërvitem këtu çdo ditë dhe një nga gjërat e para që do të bëj është ngjitja e Majës së Hekurave, pasi majat e Jezercës, Korabit, Shkëlzenit, Cikës e të tjerë i kam bërë me kohë./A2 tv
