Kryetari i Partisë Demokratike, Sali Berisha, ka reaguar ashpër pasi u paraqit në ambientet e SPAK-ut për të zbatuar masën e sigurisë “detyrim paraqitje”, në kuadër të hetimeve për çështjen “Partizani”. Në një deklaratë për mediat, Berisha hodhi akuza të rënda ndaj gjyqtares së GJKKO-së, Irena Gjoka, duke publikuar një dokument të cilin e cilëson si “provë tronditëse” që, sipas tij, zbulon një skandal në drejtësinë shqiptare.
Berisha deklaroi se gjyqtarja Gjoka është dënuar në vitin 2005 nga Kolegji Penal i Janinës në Greqi me 3 muaj burg dhe një gjobë prej 1500 eurosh, për falsifikim dokumentesh. Sipas tij, ky fakt është mbajtur i fshehur ndër vite dhe e bën absolutisht të pavlefshëm çdo vendim të saj, duke iu referuar praktikave të Gjykatës Evropiane të të Drejtave të Njeriut në Strasburg.
“Irena me pesë mbiemra, e përfolur për ryshfete gjysmë milionëshe në disa raste, është dënuar nga një gjykatë penale dhe jo administrative. Kjo monstër është lartësuar në kryetare të Gjykatës Speciale nga Edi Rama dhe është përdorur në mënyrë ekstreme nga Altin Dumani”, deklaroi Berisha.
Sipas dokumentit të shperndarë nga z.Berisha rezulton se znj.Gjoka është dënuar me 3 muaj burg dhe 1500 euro gjobë për falsifikim dokumentash.
Këtë rekord - tha z.Berisha- Irena Gjoka e ka fshehur. Iu takon institucioneve të verifikojnë origjinalitetin e dokumentit.
Ai shtoi se ka lënë një shënim në ambientet e SPAK, ku e cilëson “amnistinë elektorale” si një krim antikushtetues dhe sulmoi drejtpërdrejt drejtuesin e SPAK, Altin Dumani, si “shërbëtor të Edi Ramës”.
Berisha e mbylli deklaratën e tij duke kërkuar hetim të menjëhershëm për të kaluarën e gjyqtares Gjoka dhe duke kërkuar anulimin e çdo vendimi të dhënë prej saj, duke e cilësuar atë si “një delikuente të përdorur nga regjimi aktual”.
Ngjarja pritet të ketë jehonë të gjerë politike dhe ligjore, ndërkohë që ende nuk ka reagim zyrtar nga institucionet përkatëse mbi akuzat e ngritura.
