Nga Shkodra, Edi Rama i ka kujtuar kryetarit të bashkisë, Benet Beci, se ai është i vetmi demokrat që ia vlejti të riciklohet nga PD. Këto komente kryeministri i bëri gjatë një takimi elektoral në Shkodër, teksa i kujtoi Benet Becit dhe kohën kur ky i fundit drejtonte Fondin Shqiptar të Zhvillimit për llogari të qeverisë së Sali Berishës dhe nuk i kurseu që atëherë investimet në Shkodër.
Në takimin përmbyllës elektoral nga Shkodra, Edi Rama nuk i kurseu as ironitë për drejtuesin demokrat politik të qarkut të Shkodrës, teksa theksoi:
“Po mirë, mo, ju demokratët e Shkodrës, ju antikomunistët e mëdhenj, ju shkodranët e mëdhenj, kaq shumë ju nënvlerëson bufi sa ju ka sjellë Luçiano fake Pavarotin në krye të listës.”
Kryeministri nuk harroi t’u kujtonte shkodranëve pasaportën europiane që ai e premton si ta kishte diçka që e realizon vetë, duke thënë se vota për PS në 11 maj është, mes të tjerash, votë për anëtarësimin e Shqipërisë në familjen europiane.
