Kryetari i Partisë Demokratike në Athinë, Alfred Fizi, ka reaguar me tone të forta ndaj mënyrës së administrimit të votës së emigrantëve shqiptarë jashtë vendit, duke e cilësuar procesin si të dështuar dhe të manipuluar qëllimisht. Në një deklaratë publike në rrjetin social Facebook, Fizi ngriti alarmin për mënyrën e shpërndarjes dhe grumbullimit të zarfeve me fletë votimi në Greqi, sidomos në kryeqytetin Athinë.
“Të përfundojnë zarfet me fletët e votimit të emigrantëve në pika bastesh e të braktisur në hyrje pallatesh, dhe aq më keq që mos të dijë askush se kush i merr e kush i dorëzon, nuk është vetëm dështim i këtij procesi por një plan i studiuar nga mëndje perverse që e kanë zakon vjedhjen e votës,” shkruan Fizi.
Fizi i bëri thirrje institucioneve përgjegjëse të ndërhyjnë menjëherë për të siguruar një proces të ndershëm dhe transparent për votuesit emigrantë, duke garantuar integritetin e votës së tyre dhe shmangien e çdo tentative për manipulim.
Ndërkohë, kreu i KQZ-së Ilirjan Celibashi ka deklaruar se procesi po zhvillohet në mënyrë të rregullt dhe se deri më tani nuk është raportuar asnjë problem.
