Kryeministri Edi Rama nisi takimet elektorale ditën e sotme në qytetin e Gjirokastrës. Rama mesa duket nuk i ka dalë e keqja me gafën që bëri, kur krahasoi kundërshtarët e tij me autikët, pasi në fjalën e tij shpiku premtimin e radhës për këtë kategori duke thënë se do të dyfishohet mbështetja për nënat e tyre që nga buxheti i vitit të ardhshëm.
“Tek programet për mbrojtjen sociale. Janë një sërë programesh që ne i kemi hapur rishtaz. Për të gjithë fëmijët autikë, ose me aftësi të tjera të veçanta ne do të dyfishojmë që në buxhetin e vitit të ardhshëm mbështetjen për nënat e tyre”, tha Rama.
Ndonëse zë pjesën më të madhe të kohës televizive dhe atyre online, për të cilën shpesh është shprehur se “ndonjë ditë do u dalë dhe në frigorifer qytetarëve”, kreu i PS sot hodhi kritika për mediat dhe portalet se po çmendin qytetarët. Madje, Rama tha se gënjeshtra vazhdon edhe me videot që nxjerrin me deklaratat e tij në fushata e mëparshme premtonte ujë 24 orë dhe rrugë.
“Kur dëgjon që është për natë, e për natë, e përditë e përditë, hyn nëpër ekrane, nuk merr vesh i pari me të dytin, dëgjon vetëm gjëra që janë në rastin më të mirë gjysmë të vërteta, që siç thotë një fjalë e mençur, janë edhe gënjeshtrat më të mëdha. Dhe pastaj hyn nëpër portale një çmenduri tjetër. Shkon nëpër ato sociale, një luftë atje bam e bume, bam e bum.
Domethënë është çmenduri ‘nuk ka rrugë nëpër fshatra, kur do filloni ju rrugët nëpër fshatra’, çmenduri. Ndërkoh që njerëzit që jetojnë në fshat e dinë, edhe nxjerrin ato që kam thënë unë dikur edhe me demek ja, ujë i pijshëm, prap s’ka. Domethënë është çmenduri. ‘Nuk ka rugë nëpër fshatra, kur do filloni ju rrugët nëpër fshatra’, çmenduri. Ndërkoh që njerëzit që jetojnë në fshat e dinë” – tha Rama.
Kryeministri më tej sulmoi sërish partitë e reja duke thënë se janë “farë e keqe që polli LSI-në”, ndërsa shtoi se nuk duhet lënë që të mbijnë.
Ndërsa kreu i PD, Sali Berisha, u ndal sot në qytetin e Peqinit, ku vijoi me premtimet e zakonshme ku tha se “vota juaj me 11 Maj do të jetë votë për të kursyer xhepat e shqiptarëve 800 milionë euro dhe kjo nuk është pak se kjo kthehet në të mira për shqiptarët dhe familjet e tyre”.
Kreu i PD gjithashtu tha se Peqini madhështor do jetë Peqini i bizneseve që zgjerohen dhe lulëzojnë, që mëkëmbën dhe pasurohen nga muaji në muaj dhe viti në vit.
Berisha nuk la pa komentuar edhe takimin elektoral të Ramës në Dibër bashkë me reperin Noizy, duke thënë se “tallet me me shqiptarët. Merr daullen dhe i bie daulles. Gjen dhe Noizy-n me Lamborghini, po Lamborghini i Noizy nuk është pensione, nuk është rroga, ai ta gëzojë por ç’punë ka pensionisti me të” – u shpreh ndër të tjera lideri i PD.
