Live në telefon në emisionin “Zonë e Lirë”, një debat mes moderatori Arjan Çani dhe Komisionerit Shtetëror të Zgjedhjeve, Ilirjan Celibashi, ky i fundit ka treguar tolerancë të dukshme mbi ndalimin e sondazheve në prag të zgjedhjeve.
Dialogu i plotë:
Çani: Unë dua të bëj një sondazh të martën, por më thonë që ndalohen sondazhet javën tjetër.
Celibashi: Nuk e bën dot, ka ndalim ligjor.
Çani: Po si, dënohem me gjobë apo ka edhe ndonjë dënim tjetër?
Celibashi: Dënimi është gjobë 5 milion.
Çani: Po vetëm kaq? Domethënë nëse unë bëj sondazhin dhe paguaj gjobën, kaq është?
Celibashi: Nëse po pyet “a shkon në burg”, jo, nuk shkon në burg.
Çani: Domethënë unë flas me pronarin, po të jetë ai dakord që paguajmë gjobën, mund ta bëj sondazhin?
Celibashi: Nuk e publikon dot sondazhin.
Çani: Po unë paguaj gjobën dhe e shfaq sondazhin.
Celibashi: Shiko, merr konsultë juridike se nuk bën që unë të bëj edhe gjyqtarin edhe konsulentin.
Çani: I madh, natën e mirë.
Sqarimi i Munguar nga Komisioneri
Edhe pse Celibashi sqaroi se Kodi Zgjedhor ndalon publikimin e sondazheve në pesë ditët para zgjedhjeve, dialogu la vend për interpretime që mund të perceptohen si tolerancë ndaj shkeljes së ligjit. Zoti Celibashi nuk mund të mos e dijë se shkelja e këtij ndalimi përbën vepër penale, pasi konsiderohet ndikim i paligjshëm në procesin zgjedhor.
Kodi është i qartë: publikimi i sondazheve gjatë periudhës së ndalimit është më shumë se një shkelje administrative që përballet vetëm me gjobë. Ai konsumohet si një akt që minon procesin zgjedhor dhe mund të ketë pasoja të tjera ligjore.
Si drejtues i KQZ, Ilirjan Celibashi ka për detyrë të qartësojë median dhe publikun prerazi: çdo përpjekje për të shmangur këtë ndalim ligjor përbën një veprim të papranueshëm dhe të dënueshëm, sipas Kodit Zgjedhor. Ndalimi në Kod nuk është opsion, por është detyrim. Më së paku, Komisioneri i Zgjedhjeve duhet të kishte artikuluar qartë: “Nuk sugjeroj shkeljen e Kodit.”
Sepse për të tjerat, ndoshta ka kohë dhe institucione të tjera që vëzhgojnë dhe vetë Komisionerin.
