Teksa ndodhemi 9 ditë para zgjedhjeve, Rama dhe Berisha vijojnë të intensifikojnë takimet elektorale në qarqet kryesore të vendit.
Kryeministri Edi Rama pasditen e sotme ishte në Burrel dhe Dibër. Ndryshe nga takimet e tjera, Rama në Dibër ishte me drejtues politik, pasi përveç Blendi Klosit me vete kishte marrë edhe Belinda Ballukun e cila kishte lënë për këtë takim edhe fushatën në Fier ku është caktuar drejtuese në këto zgjedhje.
Në fjalën e tij, Rama kishte ruajtur premtimin për 1 milionë turistë edhe për Dibrën, një ditë pasi këtë e kishte thënë edhe në Kukës.
“Kjo zonë do të pësojë një nga transformimet më të mëdha që kanë pësuar zonat e Shqipërisë dhe mos u çudisni fare që në fund të kësaj dekade kjo zonë të numërojë 1 milionë turistë” – tha Rama.
Ai gjithashtu shigjetoi edhe partitë e reja, të cilat i krahasoi me LSI-në pasi sipas tij, të re kanë vetëm moshën e kryetarëve.
“Apo janë ca parti të reja, që të re kanë moshën e kryetarëve. Ato janë rikthimi në fushë i fushës së vjetër të të ndjerës LSI. Ekzakt me këto partitë e reja. Po ta kemi ne në dorë në 11 maj, do shkojmë në zgjedhje të parakohshme” – tha Rama, që ndër të tjera i premtoi edhe reperit Noizy që ishte i pranishëm në takim, se do vendoste emrin e tij një rruge të kësaj zone.
Nga krahu tjetër, lideri i opozitës Sali Berisha, zhvilloi takime në Tiranë, Fushë Krujë dhe në Kurbin. Takimi në kryeqytet ishte me familje tiranse, të cilave vijoi t’u premtojë se në mandatin e tretë të tij do zgjidh problemin e pronave.
“Së dyti, në 4 vite, cilado që të jetë kosto, ne do të zgjidhimin në mënyrë përfundimtare çështjen e pronës në Shqipëri. Ne do të bëjmë kompensimin e kthimit të pronës aty ku është pa asnjë kufizim, kompensimin monetar të saj ose kompensimin përkatës me troje”, tha Berisha.
Ndërsa në takimin me qytetarët e Fushë-Krujës, kryedemokrati u zotua se me ardhjen e tij në pushtet pas zgjedhjeve të 11 Majit, ai do të falë të gjitha gjobat dhe kamatëvonesat e KESH-it, ujit dhe gjobat e policëve bashkiakë.
