Diaspora po përballet me probleme në marrjen e zarfeve të votimit, dhe kjo situatë ka shqetësuar të dy partitë e mëdha, PS dhe PD. Ankesat më të mëdha kanë ardhur nga Greqia, ku qytetarët po hasin vështirësi në tërheqjen e zarfeve në adresë, ndërsa shkuarja dy herë për të marrë fletën e votimit është një nga problematikat më shqetësuese. Deri më tani, raportohet se rreth 20 mijë emigrantë nuk e kanë marrë ende zarfin nga posta.
Për këtë situatë ka pasur reagime nga të dyja partitë kryesore. Kryeministri Rama, nga Gjirokastra, ku mbylli fushatën elektorale, i bëri thirrje shqiptarëve të Greqisë që ende nuk e kanë marrë zarfin me fletën e votimit për shkak të vonesave nga DHL, që të shkojnë vetë dhe ta marrin zarfin për ta dërguar në Tiranë.
Ndërkohë, demokratët e shprehën shqetësimin e tyre edhe në Komisionin Qendror të Zgjedhjeve (KQZ), përmes përfaqësuesit ligjor Franc Nuri, i cili akuzoi kompaninë DHL për shkelje të protokolleve dhe paralajmëroi një denoncim në SPAK. Para tre ditësh, drejtuesja politike e PD për Diasporën, Jozefina Topalli, gjatë një konference për mediat i bëri thirrje KQZ që të kërkojë nga DHL të përmbushë detyrimet ligjore logjistike, duke theksuar se thyerja e afateve cënonte votën e shqiptarëve dhe mund të dëmtonte integritetin e zgjedhjeve.
Problemet e hasura me votën e emigrantëve, të cilat kanë kushtuar 13 milionë euro për shtetin shqiptar, kanë përgënjeshtruar deklaratën e Celibashit të datës 16 prill të këtij viti, kur ai mburrej publikisht se votimi nga jashtë “konsiderohej i kryer”.
[video width="624" height="480" mp4="https://cdnimpuls.com/vna.al/wp-content/uploads/2025/05/WhatsApp-Video-2025-05-03-at-4.11.33-PM.mp4"][/video]
