Drejtuesi politik i Partisë Demokratike për Qarkun e Fierit, Gazment Bardhi, ka reaguar me tone të forta ndaj ndalimit të kandidatit të PD-së, Semanjaku, nga Policia e Shtetit, duke e cilësuar një “akt kriminal me urdhër politik”.
Në një deklaratë për mediat, Bardhi e akuzoi policinë dhe autoritetet vendore për përdorim të metodave të ngjashme me “Sigurimin e Shtetit” në diktaturë. Ai paralajmëroi drejtuesit e Policisë së Fierit të tërhiqen nga “veprimtaria e paligjshme ndaj opozitës”, duke theksuar se pas datës 11 maj “nuk do të kenë më as Edi Ramën e as Belinda Ballukun që t’u dalë për zot”.
Sipas Bardhit, qëllimi i ndalimit të kandidatit është frikësimi i qytetarëve të Qarkut Fier për të penguar votën e lirë në zgjedhjet e 11 majit.
“Shoqërimi me dhunë i kandidatit të opozitës është një tejkalim i pashembullt mes shtetit dhe partisë. Nuk do të lejojmë që dhuna dhe presioni të diktojnë fushatën apo votën e qytetarëve”, u shpreh ai, ndërsa theksoi se asnjë kandidat i PD-së nuk do të intimidohet.
