Edi Rama, ka përcjellë një mesazh të drejtpërdrejtë për emigrantët shqiptarë që jetojnë në Greqi, duke i ftuar të shfrytëzojnë mundësinë për të votuar në mbështetje të rrugëtimit të Shqipërisë drejt Bashkimit Europian.
Në një video të publikuar në Facebook, Rama theksoi se problemet fillestare me shpërndarjen e zarfeve janë zgjidhur tashmë dhe i bëri thirrje të gjithë emigrantëve që i kanë marrë zarfet të veprojnë pa vonesë. “Në rast se i keni marrë zarfat, veproni duke i kthyer ato drejt Shqipërisë, me numrin 5,” tha Rama, duke nënvizuar rëndësinë e këtij votimi.
Ai shtoi se kjo është një mundësi historike për shqiptarët në Greqi, veçanërisht për ata që ende nuk kanë marrë pasaportën dhe përballen me vështirësi në njohjen e pensioneve. “Ky votim ka një rëndësi të veçantë për shqiptarët në Greqi që janë futur në ankthin e padrejtë të njohjes së pensionit,” theksoi ai.
Rama përfundoi thirrjen e tij me mesazhin se çdo votë ka vlerë dhe se ky proces është një hap i rëndësishëm drejt integrimit europian të vendit.
