Partitë politke kanë nisur të shfaqin shqetësimet e tyre për votën e diasporës. Kryeministri Edi Rama dje nga Lezha dhe sot nga Korça ka bërë thirrje për angazhim më të madh nga ana e emigrantëve shqiptarë në Greqi. Madje ai shkoi më tej duke kërkuar që shkojnë vetë të tërheqin zarfin për të votuar. Nga selia blu drejtuesja politike për Diasporën nga radhët e PD, Jozefina Topalli në një konferencë për gazetarët tha se KQZ dhe SPAK duhet të hetojnë verifikimet ligjore që po ndodhin me votat e emigrantëve vecanërisht në Greqi. Sipas saj, këto manipulime janë kthyer tashmë në normalitet dhe se është një shqetësim i madh. "Kemi raste në Itali ku një zonjë që punon në ambasadë në Romë mbledh zarfe dhe i dorëzon në mënyrë antiligjore. Në Greqi është në të tërë territorin e shtetit. Kemi informacione që marrin makina me qera nga Shqipëria dhe i çojnë në Greqi për të mbledhur vota"- tha ndër të tjera Topalli e cila nënvizoi se në Greqi e kanë kthyer jashtë kontrollit këtë proces. Sakaq, një vëzhgim i Shoqatës së Diasporës nënvizon se vijon të jetë problem vota e emigrantëve. Duke shënuar kështu parregullsi të mëdha. Vetëm 6 ditë nga mbajtja e zgjedhjeve parlamentare në Greqi, numri i shqiptarëve që e kanë zgjedhur preferencën politike vijon të mbetet i ulët. Aktualisht në Parkun Olimpik janë administruar 23.640 vota ose thënë ndryshe 9.6% e fletëve nga shteti i dyte me më shumë shqiptarë të regjistruar, përkatësisht 68380. Po ashtu, Greqia është edhe shteti me më shumë fletë të pa tërhequra, me mbi 10 mijë të tilla.
