Zëvendëskryeministrja Albana Koçiu ka reaguar pas tensioneve të regjistruara gjatë protestës së studentëve, duke dënuar aktet e dhunës dhe sulmet ndaj institucioneve dhe Policisë së Shtetit.
Përmes një reagimi publik, Koçiu e cilësoi të trishtë degradimin e protestës në akte dhune, duke ironizuar pretendimet për provokim nga pllakat e trotuareve.
“Dhuna nuk ka qenë, nuk është dhe nuk do të jetë kurrë zgjidhje”, theksoi zëvendëskryeministrja, e cila dënoi hedhjen e gurëve, sulmet ndaj efektivëve të policisë dhe dëmtimin e pronës publike.
Koçiu e zhvendosi gjithashtu vëmendjen te përgjegjësia politike për zhvillimet, duke pretenduar se të rinjtë po përdoren nga kundërshtarët politikë për të mbuluar, sipas saj, paaftësinë e tyre.
“Zhurma e gurëve, sulmet ndaj institucioneve dhe Policisë së Shtetit, si dhe shkatërrimi i pakuptimtë i pronës publike, nuk janë gjuha me të cilën i ka hije rinisë të shprehet”, u shpreh ajo.
Reagimi i zëvendëskryeministres vjen në një klimë tensionesh gjatë protestës së studentëve, ku përplasjet dhe përdorimi i mjeteve të ndërhyrjes nga policia kanë shoqëruar zhvillimet para institucioneve arsimore.
