Institucioni po verifikon edhe respektimin e të drejtave të personave të shoqëruar në polici, përfshirë të drejtën për avokat, njoftimin e familjarëve dhe ekzaminimin mjekësor.
Avokati i Popullit ka nisur një hetim administrativ kryesisht për të vlerësuar përdorimin e forcës nga Policia gjatë protestës së zhvilluar sot në Tiranë.
Sipas njoftimit të institucionit, hetimi do të përqendrohet në vlerësimin e domosdoshmërisë dhe proporcionalitetit të forcës së përdorur nga efektivët e Policisë, në përputhje me nenet 2, 3 dhe 11 të Konventës Evropiane për të Drejtat e Njeriut.
Paralelisht, grupet e monitorimit të Avokatit të Popullit janë angazhuar në terren, në Bllokun e Sigurisë dhe pranë komisariateve ku po mbahen personat e shoqëruar gjatë protestës.
Monitorimi synon të verifikojë nëse personave të shoqëruar u garantohen të drejtat ligjore, përfshirë aksesin te avokati, njoftimin e familjarëve dhe mundësinë për t’iu nënshtruar një ekzaminimi mjekësor.
Përveç hetimit të nisur kryesisht, Avokati i Popullit u ka bërë thirrje qytetarëve që mendojnë se u janë shkelur të drejtat gjatë protestës, të paraqesin ankesa individuale pranë institucionit.
Qytetarët mund të kontaktojnë Avokatin e Popullit përmes kanaleve zyrtare të komunikimit, për të denoncuar rastet e pretenduara të shkeljes së të drejtave të tyre.
