Studentët kanë mbushur rrugën përpara Ministrisë së Arsimit në Tiranë, duke zhvilluar protestën kombëtare të paralajmëruar më herët. Të mbledhur para godinës, ata kanë ngritur zërin kundër qeverisë Rama, duke kërkuar ndryshim dhe një të ardhme më të mirë në vendin e tyre.
Protesta është shoqëruar me tensione, pasi studentët kanë goditur godinën e Ministrisë me vezë, bojë dhe tullumbace të mbushura me ujë.
Gjatë tubimit, në muret e institucionit janë shkruar edhe mesazhe kundërshtuese, mes tyre “Dorëheqje” dhe “Ministria e turpit”. Protestuesit e kanë cilësuar tubimin si protestën e “tretë të vërtetë”.
Përmes thirrjeve të tyre, studentët kanë kërkuar dorëheqjen e kryeministrit Edi Rama dhe të qeverisë së tij, ndërsa kanë bërë apel për revolucion dhe ndryshim të situatës në vend.
Tubimi para Ministrisë së Arsimit vjen në kuadër të reagimit të studentëve ndaj problematikave që, sipas tyre, kërkojnë zgjidhje, si dhe pakënaqësisë së shprehur ndaj qeverisjes aktuale.
