Studentë dhe të rinj janë mbledhur këtë të martë, më 13 tetor, përpara Ministrisë së Arsimit në Tiranë, në kuadër të protestës kombëtare të paralajmëruar për të ngritur zërin për problematikat që shqetësojnë të rinjtë në Shqipëri.
Përmes një thirrjeje publike, organizatorët u kanë bërë apel studentëve nga të gjitha qytetet e vendit, si dhe qytetarëve të tjerë, që t’i bashkohen tubimit dhe të kërkojnë zgjidhje për shqetësimet që, sipas tyre, vijojnë të mbeten pa përgjigje nga institucionet përgjegjëse.
Në fokus të protestës janë kushtet në universitetet shqiptare, kostot e studimeve, mbështetja për studentët dhe mundësitë për punësim pas përfundimit të arsimit të lartë.
Një tjetër shqetësim i ngritur lidhet me mospërputhjen mes formimit universitar dhe kërkesave të tregut të punës, një problem që, sipas studentëve, vështirëson integrimin profesional të të rinjve dhe nxit largimin e tyre nga vendi.
Organizatorët synojnë që protesta të shërbejë si një formë reagimi qytetar ndaj problematikave të arsimit dhe perspektivës së të rinjve në Shqipëri.
Krahas kërkesave që lidhen me arsimin, në thirrjet e bëra publike janë artikuluar edhe kërkesa politike, përfshirë largimin e kryeministrit Edi Rama dhe krijimin e një qeverie teknike tranzitore.
Pjesëmarrja në protestë dhe vijimi i tubimit pritet të përcaktojnë ecurinë e mëtejshme të këtij reagimi qytetar.
