Disa protestues kanë hyrë brenda perimetrit të Ministrisë së Arsimit në Tiranë, ndërsa situata në protestën e studentëve është përshkallëzuar. Në përgjigje të tensioneve, policia ka përdorur gaz lotsjellës për të shpërndarë turmën.
Më herët, protestuesit goditën me vezë dhe gurë godinën e ministrisë, duke thyer disa xhama. Gjithashtu, një grup të rinjsh shkëputën me forcë kangjellat e vendosura përpara institucionit.
Forcat e rendit ndërhynë në përpjekje për të vënë situatën nën kontroll, ndërsa përmes megafonit u bënë thirrje protestuesve të distancoheshin nga aktet e dhunës.
Protesta nisi me thirrje kundër qeverisë Rama dhe kërkesa për ndryshime në vend. Studentët kërkojnë një të ardhme më të mirë në Shqipëri, ndërsa mes mesazheve të tyre është edhe kërkesa për dorëheqjen e kryeministrit Edi Rama dhe të qeverisë së tij.
Zhvillimet para Ministrisë së Arsimit vijojnë të shoqërohen me tensione, ndërsa policia ka ndërhyrë me gaz lotsjellës pas hyrjes së disa protestuesve brenda perimetrit të institucionit.
