Lëvizja “Studentët n’Protestë” ka njoftuar një fazë të re të organizimit të protestave kombëtare kundër qeverisë, duke vendosur që tubimet të zhvillohen dy herë në javë, çdo të mërkurë dhe të shtunë, në orën 14:00. Sipas organizatorëve, ndryshimi i shpeshtësisë së protestave synon t’u japë studentëve dhe mbështetësve mundësi për një angazhim më të madh në çdo tubim, duke ruajtur presionin ndaj qeverisë.
Në deklaratën e tyre, studentët akuzojnë pushtetin se ka injoruar kërkesat e protestuesve dhe shprehen të vendosur për të vijuar kundërshtimin e qeverisë deri në arritjen e qëllimit të tyre.
Sipas njoftimit të shpërndarë nga organizatorët, protesta e radhës kombëtare është parashikuar të shtunën në 14:00 përballë Ministrisë së Arsimit.
Studentët theksojnë se ndryshimi i kalendarit nuk nënkupton tërheqje nga kërkesat e tyre, por kalimin në një fazë të re organizimi, me synimin për të vijuar protestat dhe kërkesën për largimin e kryeministrit Edi Rama.
