Detaje të reja janë zbardhur nga shpërthimi i fuqishëm në një pallat pesëkatësh në qytetin e Elbasanit, ku një person ka humbur jetën, ndërsa tetë të tjerë kanë përfunduar në spital, mes tyre edhe fëmijë.
Ndërkohë, një i moshuar rezulton ende i zhdukur dhe po kërkohet nga ekipet e shpëtimit. Autoritetet nuk përjashtojnë mundësinë që bilanci i viktimave të rëndohet.
Shpërthimi ka shkaktuar dëmtime të rënda në strukturën e ndërtesës. Kati i katërt i pallatit është shembur mbi katin e tretë, ndërsa zjarri, që fillimisht ka përfshirë katin e tretë, është përhapur edhe në katet e tjera.
Drejtori i Policisë së Elbasanit, Kastriot Skënderaj, ka dhënë detaje nga vendngjarja, ndërsa forcat zjarrfikëse kanë ndërhyrë për evakuimin e banorëve dhe shuarjen e flakëve.
“Bëhet fjalë për një pallat pesëkatësh. Ka dëmtime të strukturës së pallatit. U shemb kati i katërt, i cili ra mbi katin e tretë. Morëm masa për evakuimin e banorëve dhe shuarjen e zjarrit, që fillimisht ishte në katin e tretë dhe më pas u përhap në katet e tjera. Viktima u gjet në katin e pestë, ndërsa një i moshuar ende nuk është gjetur”, kanë bërë të ditur shërbimet zjarrfikëse.
Operacioni i kërkim-shpëtimit vijon për gjetjen e personit të zhdukur, ndërsa autoritetet po punojnë për të përcaktuar shkakun e shpërthimit.
