Studentët kanë vijuar edhe këtë të mërkurë protestën kundër qeverisë, duke marshuar në rrugët e Tiranës dhe duke kërkuar dorëheqjen e kryeministrit Edi Rama.
Me pankarta në duar dhe thirrje kundër qeverisë, të rinjtë janë nisur drejt Ministrisë së Arsimit, duke vijuar mobilizimin në ditën e 23-të të protestës së tyre.
Gjatë marshimit, studentët u kanë bërë thirrje edhe të rinjve të tjerë që t'i bashkohen protestës dhe të bojkotojnë procesin mësimor, duke këmbëngulur në kërkesën për largimin e kryeministrit.
Ndërkohë, Edi Rama ka përsëritur ftesën për dialog me studentët, por këta të fundit kanë refuzuar të ulen në bisedime, duke e cilësuar dorëheqjen e tij si kusht të panegociueshëm.
Protestat studentore vijojnë prej më shumë se tri javësh në kryeqytet, ndërsa të rinjtë kanë paralajmëruar se nuk do të ndalen deri në përmbushjen e kërkesës së tyre kryesore.
