Prej një jave, në komisionet parlamentare të Kuvendit të Shqipërisë ka nisur diskutimi intensiv i projektbuxhetit të shtetit për vitin 2027. Institucionet kanë filluar raportimet e tyre, ndërsa deputetët po shqyrtojnë një nga dokumentet më të rëndësishme për financat publike dhe ekonominë e vendit.
Por teksa në tryezë është vendosur mënyra se si do të shpenzohen miliarda euro nga taksat e shqiptarëve, diskutimet në komisione kanë nxjerrë në pah edhe momente që ngrenë pikëpyetje serioze mbi përgatitjen e një pjese të ligjvënësve për të analizuar dhe argumentuar shifrat e buxhetit.
Jo pak deputetë të Partisë Socialiste janë mjaftuar me leximin e relacioneve të përgatitura paraprakisht, pa i ngritur sytë nga fleta dhe, në disa raste, duke u ngatërruar edhe gjatë leximit. Përtej prezantimeve formale, ajo që bie në sy është mungesa e argumentimit të detajuar për çështjet që diskutojnë.
Një prej rasteve është ai i deputetes së Vlorës, Briseida Çakërri, e cila gjatë diskutimit për paketën fiskale pati vështirësi në paraqitjen e argumenteve të saj, duke krijuar përshtypjen se nuk ishte familjarizuar mjaftueshëm me materialin që po lexonte.
Një tjetër moment u regjistrua në Komisionin për të Drejtat e Njeriut dhe Mjetet e Informimit Publik, ku deputetja socialiste Iris Luarasi foli për një buxhet prej 10 milionë eurosh. “Nuk ka pasur kurrë një buxhet që shkon në një shifër të tillë”, u shpreh ajo, duke ngatërruar milionat me miliardat. Në fakt, projektbuxheti i shtetit për vitin 2027 është rreth 10 miliardë euro, një diferencë që nuk mund të kalojë pa u vënë re në një diskutim parlamentar për financat e vendit.
Ndërkohë, deputetja socialiste Zegjine Çaushi, anëtare e Komisionit të Ligjeve, ka tërhequr vëmendjen për një tjetër kontrast: ndërsa në diskutimet parlamentare nuk spikat për ndërhyrjet e saj, në rrjetet sociale nuk mungojnë postimet me pamjen e re, të shoqëruara me përshkrime për punën dhe diskutimet në komisione.
Këto situata tregojnë se kontributi në parti nuk është garanci për përgatitjen në Kuvend dhe se as Akademia Politike e PS-së nuk mjafton për të mbushur boshllëqet. Qytetarët kanë të drejtë të kërkojnë deputetë që e kuptojnë buxhetin, e shqyrtojnë dhe japin llogari për votën e tyre. Sepse në fund, faturën e vendimeve të marra pa e kuptuar atë që votohet, e paguajnë shqiptarët.
