Avokati i kryebashkiakut të Tiranës, Erion Veliaj, Plarent Ndreca, ka paralajmëruar publikimin e disa faqeve nga ditari personal i klientit të tij, ku janë dokumentuar përgjigjet që ky i fundit i ka dhënë ministrit të Drejtësisë, Toni Gogu.
Përmes një reagimi pas takimit me Veliajn në burgun e Fierit, Ndreca bëri të ditur se kryebashkiaku i ka dorëzuar disa shënime personale, përmbajtja e të cilave pritet të bëhet publike.
“Erioni më dorëzoi disa faqe të shkëputura nga ditari i tij personal, ku ka shkruar përgjigjet që i ka komunikuar Ministrit të Drejtësisë lidhur me kërkesat e bëra ndaj tij. Këto përgjigje do t’i bëjmë publike”, deklaroi Ndreca.
Ndërkohë, avokati ka dhënë detaje edhe për gjendjen shëndetësore të Veliajt, i cili është transferuar në ambientet spitalore të burgut të Fierit për shkak të një frakture në këmbë.
Sipas tij, pavarësisht kërkesave të përsëritura, autoritetet ende nuk kanë realizuar ekzaminimin e nevojshëm për të vlerësuar ecurinë e rikuperimit të frakturës.
“Erioni është transferuar në ambientet spitalore të burgut të Fierit, për shkak të këmbës së thyer, e cila kërkon ende rikuperim dhe trajtim mjekësor. Ndërkohë, po bëhen gati dy javë që kemi kërkuar zyrtarisht kryerjen e ekzaminimit të nevojshëm për të vlerësuar ecurinë e konsolidimit të frakturës. Deri më sot, ky ekzaminim nuk është realizuar, pavarësisht kërkesave dhe udhëzimeve të mjekut që ndjek rikuperimin e tij”, u shpreh avokati.
Ndreca nuk ka dhënë detaje mbi përmbajtjen e përgjigjeve që Veliaj i ka komunikuar ministrit të Drejtësisë, ndërsa mbetet për t'u parë se çfarë do të zbulohet nga publikimi i faqeve të ditarit.
