Policia e Tiranës ka vendosur 36 gjoba ndaj protestuesve që morën pjesë në tubimin e zhvilluar më 3 nëntor në kryeqytet, me argumentin se kanë bllokuar rrugët dhe kanë penguar qarkullimin e automjeteve.
Sipas njoftimit zyrtar, masat administrative janë vendosur për bllokimin e bulevardit “Dëshmorët e Kombit” dhe rrugës së Durrësit, ku protestuesit nuk u janë bindur thirrjeve të përsëritura të efektivëve të Policisë për lirimin e rrugës.
Për secilin prej 36 protestuesve është vendosur një gjobë prej 5 mijë lekësh, duke e çuar në 180 mijë lekë vlerën totale të masave administrative të vendosura për tubimin e një dite më parë.
Gjobat janë vendosur në zbatim të Aktit Normativ nr. 5, të datës 28 tetor 2026, konkretisht pikës 2 të nenit 24/1, që parashikon masa administrative për pengimin e qarkullimit rrugor gjatë tubimeve.
Ndërkohë, Policia ka bërë të ditur se materialet procedurale i janë referuar Prokurorisë për veprime të mëtejshme.
Kjo është dita e dytë radhazi që Policia e Tiranës vendos gjoba ndaj protestuesve për bllokimin e rrugëve. Një ditë më parë u raportuan edhe 16 masa administrative, po me vlerë 5 mijë lekë secila, për tubimin e 2 nëntorit.
