Irani po shfaqet si një kundërshtar gjithnjë e më i aftë në hapësirë, duke arritur të sfidojë operacionet ushtarake amerikane në Lindjen e Mesme, pavarësisht sulmeve të SHBA-së ndaj objekteve kryesore iraniane të lidhura me këtë sektor. Përfundimi vjen nga një raport i Agjencisë së Inteligjencës së Mbrojtjes, pjesë e Pentagonit, i cili ngre pikëpyetje mbi pretendimet amerikane për epërsi të plotë hapësinore ndaj Teheranit.
Sipas raportit, gjatë operacionit ushtarak “Epic Fury”, Irani ndërmori veprime kundër kapaciteteve hapësinore të Shteteve të Bashkuara, duke përdorur sisteme bllokimi me bazë tokësore, të afta të ndërhyjnë në sinjalet GPS që transmetohen përmes satelitëve. Paralelisht, Teherani po zgjeron programet e tij hapësinore, si në fushën ushtarake, ashtu edhe në atë civile, me synimin për të forcuar kapacitetet mbrojtëse, zhvillimin ekonomik dhe prestigjin kombëtar.
Rëndësia në rritje e këtij sektori u theksua edhe nga gjenerali Todd Benson, komandant i Forcave Hapësinore Qendrore të SHBA-së, i cili deklaroi gjatë një takimi të Institutit Mitchell muajin e kaluar se “hapësira është e arritshme dhe e përballueshme sot”. Sipas të dhënave të Institutit Amerikan të Ndërmarrjeve, Irani zotëron rreth një duzinë satelitësh funksionalë, ndërsa Shtetet e Bashkuara kanë në orbitë një flotë mbi një mijë herë më të madhe.
Megjithatë, numri më i vogël i satelitëve nuk e përjashton mundësinë që Irani të shkaktojë probleme në sistemet amerikane. Teherani raportohet se ka përfituar gjithashtu nga mbështetja satelitore e Kinës dhe Rusisë, për të përmirësuar aftësitë e mbledhjes së informacionit dhe identifikimit të objektivave ushtarake.
Ndërsa Uashingtoni ka pretenduar se ka siguruar “epërsi hapësinore” ndaj Iranit, disa ekspertë amerikanë të mbrojtjes kanë vënë në dyshim këtë vlerësim. Todd Harrison, ekspert i hapësirës ajrore në Institutin Amerikan të Ndërmarrjeve, deklaroi për Axios se nëse Irani është në gjendje të dobësojë kapacitetet hapësinore amerikane, atëherë pretendimi për epërsi ndaj tij vihet seriozisht në pikëpyetje.
Raporti i DIA-s evidenton gjithashtu se Irani po punon për të rritur qëndrueshmërinë e sistemeve të veta të drejtimit dhe navigimit ndaj sulmeve elektronike. Kjo tregon se Teherani nuk po synon vetëm zgjerimin e pranisë së tij në hapësirë, por edhe mbrojtjen e teknologjive që mund të luajnë një rol vendimtar në operacionet ushtarake.
