Grabitja e bankës së nivelit të dytë, e ndodhur të hënën në zonën e Komunës së Parisit në Tiranë, ku u morën rreth 60 mijë euro, ka zgjatur vetëm tre minuta.
Policia ka ngritur dyshime ndaj një personi, i cili mendohet se kishte vëzhguar ambientet e bankës përpara grabitjes. Megjithatë, deri më tani nuk janë siguruar prova që konfirmojnë përfshirjen e tij në ngjarje.
Sipas hetuesve, autori duket se ka pasur informacion të saktë për vendndodhjen e parave, çka ka ngritur dyshime se mund të jetë ndihmuar nga persona të tjerë, përfshirë edhe punonjës të institucionit bankar.
Një tjetër pistë që po hetohet është mundësia që i njëjti autor të ketë kryer edhe grabitjen e një banke tjetër në muajin qershor, në një zonë jo shumë larg vendit ku ndodhi ngjarja e fundit.
Dyshimet e policisë mbështeten në faktin se në të dyja rastet autori ka humbur gjurmët në të njëjtin vend. Megjithatë, lidhja mes dy grabitjeve mbetet ende e pakonfirmuar dhe po verifikohet nga grupi hetimor.
