Një efektiv i Forcave të Armatosura të Shqipërisë ka mbetur i plagosur me armën e shërbimit gjatë kryerjes së detyrës në Bazën Ajrore të Kuçovës.
Sipas njoftimit zyrtar të Ministrisë së Mbrojtjes, ngjarja ka ndodhur pasditen e së martës, më 3 nëntor, rreth orës 16:46, kur efektivi me inicialet E.D. është plagosur në shpatull.
Menjëherë pas incidentit, efektivit i është dhënë ndihma e parë mjekësore dhe më pas është transportuar drejt Spitalit Rajonal të Beratit, ku i është nënshtruar ekzaminimeve dhe vlerësimit të gjendjes shëndetësore.
Sipas mjekëve, parametrat jetësorë të të plagosurit janë brenda normave dhe ai ndodhet jashtë rrezikut për jetën. Megjithatë, për të siguruar trajtim më të specializuar mjekësor, është vendosur transferimi i tij drejt Spitalit Universitar të Traumës në Tiranë.
Ndërkohë, Policia Ushtarake ka mbërritur në vendngjarje dhe po kryen veprimet e nevojshme procedurale për dokumentimin e incidentit, si dhe për sqarimin e plotë të shkaqeve dhe rrethanave në të cilat ka ndodhur plagosja.
Deri në këtë fazë, nuk janë bërë të ditura detaje të tjera lidhur me mënyrën se si ka ndodhur incidenti. Rrethanat e ngjarjes pritet të sqarohen pas përfundimit të verifikimeve nga autoritetet përkatëse.
