Studentët kanë vijuar edhe këtë të mërkurë protestën kundër kryeministrit Edi Rama, duke kërkuar dorëheqjen e tij. Tubimi ka hyrë në ditën e 23-të radhazi, ndërsa të rinjtë kanë marshuar në rrugët e kryeqytetit.
Me pankarta në duar, protestuesit janë drejtuar drejt Fakultetit Ekonomik, duke u bërë thirrje studentëve të tjerë që t'i bashkohen protestës kundër qeverisë.
Kërkesa kryesore e tyre mbetet largimi i kryeministrit Edi Rama nga detyra, të cilin e konsiderojnë kusht të panegociueshëm.
Ndërkohë, prej disa ditësh, kreu i qeverisë u ka bërë thirrje studentëve për dialog, por propozimi i tij është refuzuar vazhdimisht nga protestuesit.
Studentët kanë deklaruar se nuk pranojnë negociata me kryeministrin, duke këmbëngulur se dorëheqja e tij është kërkesa e tyre kryesore.
Protestat studentore vijojnë prej më shumë se tri javësh, me marshime dhe thirrje për bojkot të mësimit në disa fakultete të Tiranës.
