Fushata për zgjedhjet parlamentare të 11 majit është shoqëruar me tensione në disa qarqe të vendit. Prokuroria e Përgjithshme bëri me dije se deri më 28 prill 2025 janë regjistruar 14 kallëzime penale në prokuroritë me juridiksion të përgjithshëm, kryesisht për veprat penale që lidhen me procesin zgjedhor.
Kallëzimet kanë të bëjnë me “Pengimin e subjekteve zgjedhore”, “Dëmtimin me dashje të materialit zgjedhor”, “Përdorimin e funksionit publik për veprimtari politike ose zgjedhore” dhe “Kanosjen apo dhunimin ndaj pjesëmarrësve në zgjedhje”. Rastet janë raportuar në Tiranë, Fier, Sarandë, Durrës, Elbasan dhe Gjirokastër.
Sipas Prokurorisë, në pesë raste kallëzimet janë bërë nga policia gjyqësore, në tre raste nga SPAK-u, në dy raste nga subjektet politike, ndërsa dy të tjera janë nisur nga qytetarë dhe hetimi kryesisht.
Për nga përhapja, qyteti i Fierit mban numrin më të madh të kallëzimeve, me pesë raste të regjistruara, pasuar nga Saranda me tre raste dhe Tiranë e Gjirokastër me nga dy raste secila. Durrësi dhe Elbasani raportojnë nga një rast.
Deri tani, nga kallëzimet janë regjistruar shtatë procedime penale, ku pesë prej tyre janë në Prokurorinë e Fierit dhe dy në Prokurorinë e Gjirokastrës. Një kallëzim nga Durrësi dhe një procedim penal nga Fieri janë dërguar për kompetencë në SPAK. Ndërkohë, pjesa tjetër e kallëzimeve mbetet në fazën e verifikimit.
