Gazetarja Fatjona Mejdini ka publikuar një analizë të detajuar mbi vendimmarrjet e fundit të presidentit Donald Trump në botë dhe Ballkan mbi "non gratat" amerikane.
Gazetarja analizon se sinjalet e para tregojnë për një qasje më të relaksuar të administratës Trump ndaj sanksioneve.
"Këtë muaj"-shkruan Mejdini-"Shtetet e Bashkuara hoqën sanksionet financiare ndaj një bashkëpunëtori të ngushtë të kryeministrit hungarez, Viktor Orban — një hap që sinjalizon një ndryshim të mundshëm në politikën e jashtme amerikane.
Në të njëjtën kohë, mediat në Bosnje raportuan se Željka Cvijanović, kryetarja e radhës së Presidencës së Bosnjë-Hercegovinës dhe një aleate e afërt e liderit të Republikës Srpska, Milorad Dodik, ka marrë vizë për të udhëtuar në SHBA, megjithëse aktualisht ndodhet nën sanksione amerikane".
Sipas saj në dhjetë vitet e fundit, siç dëshmon baza e të dhënave Shtetet e Bashkuara kanë qenë aktori kryesor në vendosjen e sanksioneve në Ballkanin Perëndimor — duke goditur rreth 100 individë dhe 60 kompani, dhe duke mbuluar afërsisht 94% të masave ndëshkuese në rajon.
Në një klimë të tillë politike, lobimi për të përfituar nga ndryshimet e politikave të Uashingtonit është një veprim i pritshëm. Por po aq legjitime është që qytetarët të kërkojnë transparencë mbi çmimin politik që paguhet në këto procese dhe që institucionet e drejtësisë të hetojnë burimin e fondeve të përdorura për lobim.
Në një moment kur politikat e sanksioneve globale po ridimensionohen, Ballkani Perëndimor rrezikon të bëhet jo vetëm fushëbetejë politike, por edhe laborator eksperimentimi për një qasje më të zbutur ndaj standardeve të sundimit të ligjit dhe llogaridhënies.
