Nga Lori Ewing
UEFA i ka kërkuar një gjykate federale amerikane leje për të marrë dëshmi dhe dokumente nga entitete të FIFA-s në Florida, për t’i përdorur në kallëzimin penal të planifikuar në Zvicër kundër presidentit të FIFA-s, Xhani Infantino, sipas një dokumenti të depozituar në gjykatë.
Me kërkesën e njërës palë të paraqitur në bazë të ligjit amerikan, organi drejtues i futbollit europian tha se po shqyrton nisjen e procedurave penale kundër Infantinos dhe potencialisht ndaj zyrtarëve dhe këshilltarëve të tjerë të FIFA-s, lidhur me një plan tashmë të braktisur për transferimin e të drejtave komerciale të lidhura me Kupat e Botës për meshkuj dhe femra, si dhe me Kupën e Botës për Klube, te një filial i ri i quajtur FIFA Forward Enterprise (FFE).
UEFA pretendon se Infantino e zhvilloi propozimin në fshehtësi me një grup të vogël këshilltarësh dhe investitorësh, duke anashkaluar proceset normale të qeverisjes së FIFA-s dhe pa u konsultuar me Këshillin e FIFA-s, konfederatat rajonale apo shoqatat anëtare.
Kërkesa e paraqitur në gjykatën amerikane lidhet me autorizimin për marrjen e dokumenteve dhe dëshmive nga FIFA (AMERICAS), Inc. dhe FWC2026 US, Inc., dy entitete të FIFA-s me bazë në Florida. UEFA tha se këto organizata mund të kenë dokumente dhe dëshmitarë që lidhen me mënyrën se si u konceptua, u strukturua, u vlerësua dhe u miratua transaksioni i FFE-së.
UEFA tha se ajo dhe palë të tjera të interesuara po përgatitnin kërkesa ligjore në Zvicër kundër Infantinos për keqadministrim të dyshuar si shkelje penale, sipas nenit 158 të Kodit Penal zviceran. Në dokument thuhet se Infantino dhe një grup i vogël këshilltarësh dhe investitorësh e zhvilluan planin për më shumë se një vit pa u konsultuar me Këshillin e FIFA-s, konfederatat rajonale apo 211 shoqatat anëtare, përpara se ai të bëhej publik më 28 korrik. UEFA tha se statutet e FIFA-s i japin Këshillit autoritetin ekskluziv për të vendosur se si promovohen të drejtat komerciale të FIFA-s.
Sipas dokumentit të depozituar, Infantino caktoi Thrive Eternal, një institucion investimi i kontrolluar nga Joshua Kushner dhe i lidhur me Thrive Capital, për të udhëhequr një grup investitorësh. UEFA pretendon se investitorët do të fitonin interes financiar të përhershëm në krahun komercial të FIFA-s dhe se ish-drejtori ekzekutiv i Liberty Media, Greg Maffei, ishte angazhuar si këshilltar kryesor komercial për transaksionin.
UEFA tha se investitorët do të paguanin 4.2 miliardë dollarë për një pjesë të FIFA Forward Enterprise, duke e vlerësuar biznesin në rreth 20 miliardë dollarë. UEFA tha se ky vlerësim e nënvlerësonte ndjeshëm vlerën e të drejtave komerciale të FIFA-s dhe pretendon se transaksioni nuk iu nënshtrua një ankandi të hapur dhe as nuk u testua përmes një vlerësimi të pavarur. Sipas dokumentit, propozimi hasi shpejt në kundërshtime në të gjithë botën e futbollit.
UEFA tha se 55 shoqatat e saj anëtare ranë dakord unanimisht në një mbledhje emergjente më 30 korrik se nuk do të merrnin pjesë në garat e FIFA-s, përfshirë Kupën e Botës, nëse plani nuk tërhiqej. Ajo tha se më vonë këtij qëndrimi iu bashkuan edhe Konfederata Aziatike e Futbollit (AFC) dhe CONCACAF.
UEFA gjithashtu iu referua dorëheqjes së Karlos Kordeiro, këshilltarit të lartë të Infantinos për strategjinë dhe qeverisjen globale dhe ish-presidentit të Federatës së Futbollit të SHBA-së. Sipas dokumentit, Kordeiro dha dorëheqjen më 31 korrik, duke e përshkruar propozimin si “një marrëveshje të keqe për shoqatat anëtare të FIFA-s, një marrëveshje të keqe për futbollin dhe një marrëveshje të keqe për të ardhmen afatgjatë të këtij sporti.”
FIFA e braktisi propozimin më 1 gusht, por UEFA tha se mbetën pikëpyetje mbi mënyrën se si ai ishte konceptuar dhe çuar përpara. Ajo tha se punonjës të FIFA-s ishin ankuar brenda organizatës se ishin “mashtruar” dhe se Sekretari i Përgjithshëm i FIFA-s, Matias Grafshrëm, raportohet se u përjashtua nga hartimi i propozimit.
Marrë nga Reuters
